ТАЛАНТТАР ШЕРУІ

Міне, тағы бір оқу жылы аяқталды. Осыған орай, Меркі ауданы білім бөлімінің қосымша білім беру мекемесі Оқушылар «Үміт» сарайында өнерге қанат қаққан өнерлі өрендердің шығармашылығына арналған «Таланттар шеруі» атты жылдық қорытынды кеш болып өтті.

Өнер мен білімді ұштастыра білген «Үміт» сарайы өнерге, білімге, үйренудің жарқын, қызықты жолы болып табылды. Үкілеген үміттің жемісі мен жеңісін көретін бүгінгі күн — нағыз мереке! Оқушылар биылғы оқу жылының өзінде 95 халықаралық байқауға қатысып, жүлделі орын алды.Талай халықаралық би байқауларында бас жүлдені бағындырып жүрген «Жібек Жолы» бишілері «Шашу» биімен кештің шымылдығын ашты. Фанфар ойналып, балдырған жүргізушілер ортаға шықты. Оқушылар «Үміт» сарайында оқыту — дамыту бағыты бойынша жүргізілетін барлық үйірмелер шәкірттерге білімдерін тереңдетуге септігін тигізеді. Экраннан үйірмелер туралы қызықты слайдтар көрсетіліп тұрды. «Аяла» театр үйірмесі» Бауыржанның Жамбылдан бата алуы» сахналық көрінісін көрсетті.Кезек «Дәстүрлі ән» үйірмесінің домбырашылар оркестріне беріліп, «Әгугай» әні шырқалды. Халықаралық өнер байқауларының бас жүлде иегерлері, бишілер «өзбек», «қырғыз», «түрікмен», «қуыршақ», «қара жорға» билерін тартулады. Жас әншілер Бекболат, Таңнұр, Нұрасылдар «Елге сағыныш», «Бауырлар», «Ұстазыма мың алғыс» әнін орындап берді. Кішкентай әншілер «Человек — хороший» әнін керемет айтып шықты. «Әсем» көркемсурет студиясының бітіруші түлектеріне сертификат тапсырылды. Мекеме басшысы З.Бейсенбаева, орынбасары И.Мамедова сөз сөйлеп, озат оқушыларды марапаттады.Кеш соңында «Туған жер» флешмобы және сарайдың өз Гимні «Үміт» орындалды. Өнерлі ұстаздар «Ретро» биін билеп, шеттерінен өнерлі екенін көрсетті.

Ә.Боранқұлова,
Оқушылар «Үміт» сарайы