Дені саудың – тәні сау

Дана халқымызда «Дені саудың – тәні сау» деген қанатты сөз бар. Спорт күніне арнайы дайындаған мерекелік газетіміздің бірінші бетіндегі материалымызда денсаулығы мықты адам сапалы, өнімді еңбек етеді дегенді қағида етіп ұстандық.

Қазақстан Республикасы Спорт күні меркесіне орай, қоғам және мемлекет қайраткері, таяу күндері 100 жылдық мерейтойы аталып өтілетін Асанбай Асқаров атындағы стадионда үлкен мерекелік іс-шара өтті.
Мереке құрметіне аудандық облыстық, республикалық жарыстарда оза шапқан спорт майталмандарының, оза шапқан жүлдегер жеңімпаздардың салтанатты парады болып өтті. Ол шеруді жараулы ат мініп, қолдарына Мемлекеттік туымызды желбіретіп алып шыққан, 2019 жылы Шу ауданында өткен облыстық турнирдің бірінші орын иегерлері, 2020 жылы Тараз қаласында өткен Республикалық турнирдің чемпиондары, бас жүлде иегерлері, сол сияқты 2021 жылы Нұр-Сұлтан қаласында өткен көкпаршылардың Республикалық турнирінде төртінші орынды еншіленген Болат Ниязбеков, Ақылбек Елеусінов, Елдос Өркен, Нұрлан Бейсенбаев, Қуаныш Каден, Руслан Жақсылық, Хантөре Сазанқұловтар бастап шықты. Одан соң жамбы атудан Қазақстан Республикасының еңбек сіңірген бас жаттықтырушысы, 2016 жылы оңтүстік астанада өткен «Ұлы дала» ойындарының жеңімпазы, 2018-2019 жылдары Оңтүстік Корея мемлекетінде өткен жамбы атудан екі дүркін әлем чемпионы Елдос Бадашев шәкірттерімен, сонымен қатар құсбегіліктен Әлем, Азия және облыс чемпиондары Бақдәулет Бабажан, Берікболсын Бабажан, Жалғасұлы Серікболсын, жаттықтырушылары Бақдәулет Бабажанұлы, қол бұлғап өтті.

Еркін күрестен әлем чемпионатының 2-орын жүлдегері, Қазақстан Республикасының 4 дүркін жеңімпазы Нұрдәулет Қуанышбай, сол сияқты 2022 жылдың айында Бахрейн мемлекетінің Манама қаласында өткен 20 жасқа дейінгі Азия чемпионатының жеңімпазы, Қазақстан Республикасының спорт шебері. 2022 жылдың тамыз айында Болгария мемлекетінің София қаласында өткен Әлем чемпионатының күміс жүлдегері Мерей Базарбай. Қазақстан Республикасының жүлдегері Елнұр Еренсіз, Азия чемпионатының күміс жүлдегері Даулет Ергеш.
Салтанатты шеруде командаларымен аудан қол күресі шеберлері, боксшылар, қазақ күресінен облыс чемпионы, республикалық сында облыс намысын қорғаған Жамбыл Тұрғыналиев, асық ату, қол күрес, тоғызқұмалақшылар, шахматшылар, дюздошылар, таэквоншылар, каратэ-до, желаяқтар, футбол, баскетбол, волейболшылар т.б. көрермендерге қол бұлғап, ел ризалығына, қол шапалақтарына ие болып өтті.
Спорт күні меркесінде аудан әкімі Жорабек Баубеков барша жиналғандарды дүбірлі мерекемен, шын көңілмен тебірене құттықтап:
– Спорт – елдік пен ерлікті танытатын, әрбір мемлекеттің халықаралық кеңістікте атын әйгілі ететін негізгі факторлардың бірі болып табылады. Бұл орайда, біздің еліміздің жеткен жетістіктері көп екенін мақтанышпен айта аламыз. Спортпен Қазақстанның даңқын асырған елімізің өр ұландары аз емес,-дей келе ардагер спортшылар Құдайберген Жантаев, Жұмабай Сейтқұлов, Фахруддин Ибишев, Хамид Шарипов, Тынышбек Кембаев, Асқар Уалиев, Галина Швайковская, Владимир Бондаренко мен басқа да спорт жаттықтырушыларының еңбектерін атап айтты. Сөзінің соңында спортшыларға зор денсаулық, береке-бірлік және күллі Қазақ елінің абыройын асқақтататын жаңа жеңістер тілейтіндігін жеткізді.
Әрине, еліміздің ортақ жетістіктерінің ішінде өзіміздің жергілікті спортшылардың да үлесі салмақты. Меркілік спортшылар республика көлемінде ғана емес, әлем, Азия және басқа да Халықаралық деңгейде мақтанарлық нәтижелерге қол жеткізуде. Маңдайы жарқыраған, аудан намысын әлемдік, республикалық, облыстық додаларда жемісті, лайықты қорғаған спортшыларды аудан әкімі «Құрмет Грамотасымен», «Алғыс хатпен», бағалы сыйлықтармен марапаттады.
Сол сияқты аудандық мәслихат хатшысы Мұратбек Көкрекбаев та құттықтап, грамоталар мен Алғыс хаттарды жарыс жеңімпаздарына салтанатты түрде табыс етті.
Спортшылар мерекесінде «Меркі әуендері» ансамблі өнерпаздары тамылжыта әннен шашу шашты. Салтанат соңы спорттық ойындарға ұласты.

Ләззат Серікбай,
«Меркі Ақиқат»