Жастарды спортқа баулу – уақыт талабы

Ұлт денсаулығын нығайтуда бұқаралық спорттың алатын орны ерекше. Спорт – денсаулық кепілі. Салауатты өмір салтын қалыптастырып, ортасына үлгі болу әркімнің міндеті. Ауданымызда спорттық жетістіктеріміз аз емес бірақ осы жетістіктерге ауыл жастарын тартып спортқа баулысақ жеткен жетістігіміз арта түсер еді. Ауыл жастары арасында күш жігері тасыған талантты жастар өте көп. Ауыл тіршілігіне негізделген ауылдың баласы ес білгеннен бастап небір ойын жаттығуларын көрді, еңбекке қауырт араласып өсті. Ауыл жастарына тиісті деңгейде көңіл бөлінсе оларда қатардан қалмай спортпен шұғылданса деген ой. Спорт залдар мен секциялардың жоқтығына байланысты ауыл жастары көбіне егін, мал шаруашылығы күнкөріс қамымен жүреді. Спорттың қай түрін болмасын мейлі футбол, еркін күрес, бокс болсын ауылды жерлерде дамымаған. Осы аталған спорт түрлерін әр ауылдық округтерде дамытсақ, көңіл бөлсек жастар арасында мықты спортшылар шығар еді. Спорт залдардың тапшылығынан ауыл жастары аудан орталығына барып жаттығу жасауға мәжбүр. Тіпті ауылдағы азын-аулақ жұмыс істеп тұрған секцияларда тәрбиеленіп жатқан жасөспірімдер шетел тұрмақ, басқа облыстағы, қаладағы спорт сайыстарына қатысу мүмкіндігінен қағылып жатады. Себебі көбінесе өз қаржысымен баруға тура келеді. Алайда баланың жолақысын, жатын орнын, басқа да шығындарын ауылды жерде тұратын отбасының қаржылық әлеуеті көтере бермейді. Сөйтеді де, бабын сынайтын сайыстарға бара алмаған жас спортшының сағы сына береді. Жарқын болашақ кепілі жастар болса ауыл жастарынан бастайық, қолдау көрсетейік, көтерейік, залдармен спорт мектептерін ашып спортпен айналысуға мүмкіндік жасайық.

Нұржігіт Алпысбай,
Сұрат ауылдық округі жастар ісі жөніндегі инспекторы