Ынтымақ – ырысқа жетелейді

 Елбасының барлық деңгейдегі әкімдердің халық алдында есеп берулері туралы Жарлығына сәйкес аудан әкімі Өмірбеков Мейірхан Азатұлы аудандық Қоғамдық кеңес алдында есеп берді. Оған аудандық мәслихат депутаттары, округ әкімдері, үкіметтік емес ұйымдар мүшелері, аудан әкімдігінің бөлім басшылары және БАҚ өкілдері қатысты.

Кездесуге сол сияқты облыстық қоғамдық кеңестің мүшесі, Жамбыл облысы әкімдігінің білім басқармасының «Облыстық жасөспірімдер үйі» коммуналдық мекемесінің директоры Қасымов  Рүстем Қалмұхамбетұлы қатысып, сөз сөйледі.

Есеп беру кездесуін аудандық Қоғамдық кеңес төрағасы Серік Құралбай қысқаша сөз сөйлеп ашып, кезекті баяндама жасау үшін Мейірхан Азатұлына сөз берді.

Жалпы бұған дейін он төрт округ және аудан тұрғындары алдында есеп берген аудан әкімі, кеңес мүшелері алдында 2018 жылда атқарылған жұмыстар мен 2019 жылғы ең өзекті мәселелер туралы жан-жақты баяндама жасады.

Өзара кеңес, пікір алмасу түрінде өткен кездесуде кеңес мүшесі, қоғам белсендісі Қайнаркүл Тәтіқұлова аудандық аурухана жұмысының жасалып отырылған мемлекеттік қамқорлыққа қарамай, әлі де болса халыққа қызмет көрсетуі өз дәрежесінде еместігіне, дәрі-дәрмекпен қамтамасыз ету жағында да олқылықтар орын алып отырғанын, кейбір медициналық орындар әлі де болса табиғи газға қосылмағанын, бөлмелер суық екеніне ерекше назар аударды.

Кездесуде электр энергиясы, табиғи газ тарифтеріне байланысты да көптеген сұрақтар көтеріліп, көпшіліктің ренішін тудырып отырғаны да баса айтылды.

Сұрақтарға жауап берген аудан әкімі мекеме басшылары тікелей тұтынушыларға өздері барып, есеп беріп, түсінік жұмыстары жүргізілуі бұдан былай қатаң бақылауға алынатынын жеткізіп, өткен үш жылда бірлесе, өзара түсіністікте, ауданның әлеуметтік-экономикалық жағдайының күшеюіне айтулы үлес қосқан қоғамдық кеңес мүшелеріне алғысын айтып, жаңа жасақталатын құрамға табыс тіледі.

Есеп беру кездесуінде сөз алған облыстық кеңес мүшесі Рүстем Қалмұхамбетұлы  ауданның  әлеуеті әлі де болса толық пайдаланылмай отырылғандығын, аудан көптеген салалар бойынша облыста алдыңғы орында екенін, солай десе де табысты бұдан да жоғары еселей түсуге болатындығын, сол сияқты қоғамдық даму министрлігінің ұйымдастыруымен үстіміздегі ақпан айының сегізінде Қоғамдық Кеңестердің екінші Республикалық форумы өткенін, онда қоғамдық кеңестердің жұмысы қалыптасып, толыққанды жұмыс атқарып жатқанын, маусым айында Кеңестер туралы Заңға өзгерістер мен толықтырулар енгізіліп, кеңес жұмысы пәрменді жүргізілетініне тоқталып, меркіліктерге табыс тіледі.

Кеңеске қатысушылар аудан әкімінің жұмысын қуаттап, назарға алып, бірлесе, ел бірлігі, ырзығы, ынтымағы жолында қызмет атқара беретіндіктерін білдірді.