Жылы жүрек-жомарт қол

1-маусым-Халықаралық балаларды қорғау күні

Жылы жүрек-жомарт қол

Балаларды қорғау күні мерекесіне орай, жуырда  аудан әкімдігі білім бөлімінің писихологиялық-педагогикалық түзету кабинеті ұжымының ұйымдастыруымен «Жылы жүрек-жомарт қол» атты мерекелік іс –шара өтті.
Мекеме ауласы түрлі-түсті шарлармен, балаларға арналған  құттықтаулармен  әсем безендіріліп, мерекеге жиналған ата-аналар мен балалар алдында мекеме меңгерушісі Гүлнар Утешова өзінің ізгі лебізін білдірді.
Жүргізушілер,мекеме қызметкерлері Қуаныш Балтабаева мен Айнұр Бөрібаева шырайлы жыр шумақтарымен қазақ және орыс тілдерінде мерекелік концертті жүргізіп, оның мәнді де сәнді өтуіне өз үлестерін қосты.
Аудандық оқушылар «Үміт» сарайының бишілер тобының керемет биімен басталған концертті түзету кабинетінің тәрбиеленушілері жалғастырып бүлдіршіндер Отан, отбасы, ана, әке, ата-әжелері  мен табиғат туралы өлеңдерді жатқа оқып көрермендердің қошаметіне бөленді. №1 Құрманбек Жандарбеков атындағы саз мектебінің өнерпаздары Вика Печерская «Әгугай» әнін нақышына келтіре орындаса, халықаралық, облыстық байқаулар жүлдегері Ұлан Сәрсенбек «Торға жорға аттың бөгелек қағуы» атты күй шертті.Түзету кабинетінің талантты балалары Бейбарс Сүйіндік «Тұлпарым» әнін,  Айым Қойшыбай «Қарлығаш», Елдана Бектас «Аналардың тілегі», осы мектептің түлегі  Есжан Әлнұр «Туған жерім тамаша», Диана Талант «Көңілді күн» сияқты әндерді ерекше көңіл –күймен орындады. Сондай-ақ, «Үміт» оқушылар сарайының бүлдіршін бишілерінің орыс биі «Валенки» биін ұсынды. Баларға ертегі кейіпкелері келіп мерекені қыздыра түсті. Би билеп, түрлі ойындар ойнап, жеңімпаздарға сыйлықтар берілді.
Балалар мерекесіне арнайы келіп құттықтаған аудан әкімдігі білім бөлімінің бас маманы Сәуле Метерқұлова, ПМК меңгерушісі Мейраш Жұбаева, ауданның бас имамы Қасымалиев Батырбек қажы, аудандық ішкі саясат бөлімінің бас маманы  Дәрмен Күздеубай өздерінің жүрекжарды ақ тілектерін арнады. Сондай-ақ, демеушілер, аудандық  іскер әйелдер ұйымының төрайымы Айжанат Малдыбайқызы, 2090 «Сыпатай батыр» әскери бөлімшесінің қызметкері А.Талманов балаларды құттықтап сый-сыяпат жасады. Ата-аналар атынан А.Үсенқұлов пен Н.Понижина Түзету кабинетінің педагогикалық ұжымына табанды еңбектері үшін алғыстарын жеткізді.
Өздерінің тілектерін айтып аспанға шар ұшырған балаларға демеушілер тарапынан арнайы дайындалған мерекелік сыйлықтар таратылды.

                          Мейіркүл Әбжанова, «Меркі Ақиқат»