Ұлттық домбыра күні Алтын домбыра  дастан

Елбасы Жарлығымен шілденің алғашқы күні аталып өтілетін Ұлттық домбыра күні, ауданымыздың бренді саналатын «Меркі Мега» ойын-сауық орталығының сән-салтанаты келіскен алаңқайында өтті.
Ашылу салтанатында аудандық ардагерлер кеңесінің төрағасы Қ.Иманалиев құттықтау сөз сөйлеп, өнер туралы, өнер болғанда соның ішіндегі қос ішекті, сайын  даланы күмбірге, әсем әуезге, жан тербетер үнге бөлеген домбыра туралы тебірене сөйледі. Атадан балаға, ұрпақтан-ұрпаққа мұра болып келе жатқан қос ішекті алтын аспабымыздың қадір-қасиетін жас кезден сезініп өсіп, әр отбасының төрінен орын алатын, алуға тиіс бабалар мұрасын көздің қарашығындай сақтау керектігін баса айтып, жиналғандарды ұлттық домбыра  күні мерекесімен құттықтады.
Аудандық мәдениет бөлімінің ұйымдастырумен өткізілген домбыра күнінде аудандық мәдениет үйінің, №1, 2 саз мектептерінің оқушылары мен ұстаздарынан  құралған домбыра оркестрі Құрманғазының,  Нұрғиса Тлендиевтің, Әбдімомын Жолдыбаевтың, Жұмабай Сейсеновтердің «Адай», «Балбрауын», Әлқисса», «Ерке сылқым» күйлерін нақышына келтіре орындап көрермендердің көңілінен шықты.
«ММ» ойын-сауық орталығының алдында өткен айтулы іс-шара шын мәнінде айта жүретіндей мерекеге айналды.

Л.Серікбай
Аудан әкімдігінің баспасөз хатшысы