Париж төрінде жарқыраған жеңіс: Зульфия Габидуллина ел қоржынына алғашқы медаль салды

2026 жылғы 1–3 мамыр аралығында Франция астанасы Париж қаласында өтіп жатқан жүзуден әлемдік серия кезеңі Қазақстан құрамасы үшін сәтті басталды. Ел намысын абыроймен қорғап жүрген тәжірибелі параспортшы Зульфия Габидуллина алғашқы медальді ел қоржынына салып, жанкүйерлерді қуантты, деп хабарлайды baq-orda.kz.

150 метрлік кешенді жүзу сайысында Зульфия Габидуллина 3 минут 47,21 секунд нәтижесін көрсетіп, қола жүлдеге ие болды. Бұл — тек жеке жетістік қана емес, сонымен қатар Қазақстан параспортындағы табандылық пен кәсібиліктің айқын көрінісі.

Аталған халықаралық додаға әлемнің 39 елінен 200-ге жуық спортшы қатысуда. Осындай жоғары деңгейдегі бәсекеде Қазақстан ұлттық құрамасының намысын қорғап жүрген алты спортшының бірі ретінде Габидуллинаның көрсеткіші ерекше маңызға ие.

Спортшының табысты өнер көрсетуіне оның бапкері, Қазақстан Республикасының еңбек сіңірген жаттықтырушысы Саттар Ерғалиұлы Бейсембаев зор үлес қосып отыр. Жүйелі дайындық пен кәсіби шеберліктің нәтижесінде бұл жеңіс заңды жетістікке айналды.