Мемлекеттік көрсетілетін қызметтер бойынша «Онлайн жәрмеңке» өткізілді

Қазақстан Республикасы Мемлекеттік қызмет істері агенттігінің Жамбыл облысы бойынша департаменті Агенттік Төрағасымен бекітілген «Мемлекеттік көрсетілетін қызметтердің сапасы мен қолжетімділігі мәселелері жөніндегі іс-шаралар жоспарына» сәйкес мемлекеттік қызметтер мәселелері бойынша Меркі ауданы әкімдігінде «Мемлекеттік көрсетілетін қызметтер» тақырыбында ағымдағы жылдың 30 қарашасында аудан әкімдігінің Facebook әлеуметтік желісіндегі ресми парақшасында «Онлайн жәрмеңке» өткізілді.
«Онлайн жәрмеңке» іс-шарасы барысында полиция бөлімінің, қорғаныс істері жөніндегі бөлімінің, мұрағат мекемесінің және халыққа қызмет көрсету орталығының жауапты лауазымды тұлғаларының тарапынан көрсетілетін мемлекеттік қызметтер бойынша түсіндірме берілді.
Тікелей эфирде өткізілген жәрмеңке барысында әлеуметтік желі қолданушыларына Қазақстан Республикасының азаматтарына паспорттар, жеке куәліктер беру, тұрғылықты жері бойынша тіркеу және тіркеуден шығару, әскери қызметке шақыруды кейінге қалдыру, әскери міндеттілер мен әскерге шақырылушыларды әскери есепке қою және одан шығару, азаматтарды әскери қызметке шақырудан босату, запастағы офицерлерге, сержанттарға, сарбаздарға әскери билеттер (әскери билеттердің орнына уақытша куәліктер) немесе олардың телнұсқаларын беру, шетелдіктер мен азаматтығы жоқ адамдарға Қазақстан Республикасында тұрақты тұруға рұқсат беру және т.с.с көрсетілетін мемлекеттік қызметтерді алу тәртібі түсіндірілді.
Жәрмеңкеге 100-ден аса желі қолданушылары қосылып, түскен барлық сұрақтарға тікелей эфир барысында тиісті мамандар тарапынан толыққанды жауаптар берілді. Сонымен қатар, жәрмеңкеде мемлекеттік қызмет жәрмеңкесінің маңызы, тиімділігі мен сапасы жөнінде айтылды.
Мемлекеттік көрсетілетін қызметтердің сапасы мен қолжетімділігін арттыру мақсатында мемлекеттік көрсетілетін қызметтерді ұсынатын басқа да бөлімдер мен мекемелерді қатыстыра отырып, онлайн форматтағы жәрмеңке алдағы уақытта да жалғасын табатын болады.

Меркі ауданы әкімінің аппараты