Елім деген ер Асанбай

Мемлекет және қоғам қайраткері, Социалистік Еңбек Ері Асанбай Асқаровтың туылған күніне орай ауданның зиялы қауым өкілдері ескерткішке гүл шоқтарын қойып, тағзым етті.

Асанбай Асқаровтың өмірі мен еңбек жолы, жетістіктері мен елге жасаған еңбектері туралы еске алу шарасында зиялы қауым мен Асанбай Асқаровтың ағайын туыстары пікір білдіріп, сөз сөйледі.
Аудандық ардагерлер кеңесінің төрағасы Иманалиев Қамбар ақсақал өз сөзінде «Асанбайдың өмір жолы арқылы келешек ұрпақты елін, жерін, Отанын сүюге, Асанбай ағамыздан үлгі алып, бой түзеуіміз керек. Асанбайдың еңбегін барлық елі, халқы біледі. Қазақ болса да орыстан артық сөйлейтін шешен адам болатын. Келесі жылы Асанбай Асқаровтың 100 жылдық мерейтойына ел боп, халық болып атсалысайық, азаматымызды ардақтап елге көрсетейік», деп ұсыныс білдірді.
Ақын, жазушылар Одағының мүшесі Шырын Мамасерікова, ардагер ұстаз Базаркүл Әлмейізова, Асанбай Асқаровтың ағайын-бауыры атынан Қабылжан Тоқпанбетов сөз сөйлеп, А.Асқаровтың өмір жолы мен игі істерін жиналған қауымға баяндады, сонымен қатар ақын Бейбіт Шошабаев арнау айтып, мектеп оқушылары өлең жолдарын арнады.
Әрмен қарай аудандық мәдениет үйінде «Меркі» халық театры Мархабат Байғұттың «Асанбайдың аққайыңдары» атты драмалық қойылымы көпшілікке ұсынылды. Бұл қойылымды белгілі театр режиссері Әскер Құлданов сахналады.
Келесі кезекте, Асанбай Асқаровты еске алуға арналған іс-шара Меркі аудандық тарихи-өлкетану музейінде жалғасын тапты. Онда, мемлекет және қоғам қайраткері Асанбай Асқаровқа арналған бұрышы таныстырылып, музей қорын Асанбай Асқарұлының жеке заттарынан толықтыру туралы ұсыныстар айтылды.
Аудандық орталық кітапханада да келелі кездесу өткізіліп, «Ұмытылмас ұлы тұлға» атты әдеби вернисаж өтіп, оған қатысқан Тоқпанбетов Қабылжан, Ыдырысов Бақытқали «Асанбай ағамыздың халқымыз үшін еңбек еткенін, көрген қиыншылықтары, бойындағы туа біткен дарыны, халқының мәңгі жүрегінде қалады» деп, айтса, кітапхана қызметкерлері Асанбай Асқаровтың шығармаларынан үзінді оқыды.
Сондай-ақ, Асанбай Асқаровты еске алуға арналған кіші футболдан және еркін күрестен аудандық турнир өткізіліп, жеңімпаздар диплом және медальдармен марапатталды.

Альбина Советхан,
Суреттерді түсірген:
Еркін Жасыбаев, Аудан әкімдігінің баспасөз қызметі