Кәсіби білім жетілдіру- өмір талабы

2021 жылдың 21-25 маусым аралығында Жамбыл облысы білім басқармасының ұйымдастыруымен облыстағы қазақ тілі мен әдебиеті пәні мұғалімдері үшін «Эсседегі шеберлік пен үйлесімділік» тақырыбында онлайн курс ұйымдастырылды. Курс жүргізушісі-Оспанов Еділбай Төлеубайұлы.
Ол-филология ғылымдарының кандидаты, лингвист, «Болашақ» бағдарламасының түлегі, Ұлыбританиядағы Ноттингем университетінің «Білім мен ғылым саласындағы басқару» мамандығы бойынша магистратурасын тәмамдаған. «Академиялық хат» пәні бойынша шығарылған академиялық оқу құралының және шағын-онлайн
курстардың авторы Тіл білімі, тілдік коммуникация, білім саласындағы басқару,
академиялық жазылым бағыттары бойынша қазақ және ағылшын тілдерінде отыздан аса ғылыми мақалалары жарық көрген.
Жас ұрпақты заман талабына сай біліммен қаруландыру мақсатында облысымыздың әр ауданынан қатысқан сексен сегіз ұстаз курстың өзектілігімен танысып, кәсіби білімдерін жетілдірді. Соның ішінде Меркі аудандық білім бөлімінің қазақ тілі мен әдебиеті пәні әдіскері Досмұханбетова Зульфия Мэльсқызының бастамасымен ауданымыздың бірқатар тіл мамандары аталмыш онлайн курсқа қатысты.
Еділбай Төлеубайұлы эсседегі өзектілік, құндылықтарға қол жеткізу, педагогикалық үдерістегі әрбір нәтижені болжай алу, құзіретті тұлға қалыптастыруды ұйымдастыру бойынша толыққанды дәрістер оқыды. Курс барысында жазылым дағдысын қалыптастыру жолдары, жазылым арқылы білім алушылардың шығармашылық және сыни ойлау қабілеттерін қалыптастыру, эссе жаздыру жолдары, жазба жұмыстарының тақырыптарын таңдату жолдары, академиялық мәтіндер, оқушыларды жазылым үдерісіне үйрету жолдарынан жан-жақты терең білім алдық. Алдағы уақыттарда курстан алған білімімізді тәжірибеде қолданып, білім алушыларды әр түрлі бағыттағы жазылымға үйретуге бар күш-жігерімізді жұмсаймыз. Болашақтың еншісі-кәсіби шыңдалған мамандардың қолында екендігіне курс барысында бірнеше рет көз жеткіздік.Осындай игілікті іс-шараға мұрындық болған Жамбыл облысы білім басқармасы мен Меркі аудандық білім бөлімінің қазақ тілі мен әдебиеті пәні әдіскері Досмұханбетова Зульфия Мэльсқызының қолдауына аудан ұстаздарының алғысы шексіз, дегім келеді.

Гульмира Жуанышева,
Тұрар Рысқұлов атындағы №20 ЖОББМ қазақ тілі мен әдебиеті пәні мұғалімі