ЕЛ АЛҒЫСЫНА БӨЛЕНЕ БЕРІҢІЗДЕР

Біздің аудан тұрғындары және ауыл тұрғындарының тұрмыс-жағдайларында ешқандай кемшіліктері жоқ деп айтамын. Себебі, ауылымызда және көшемізде бір күн газ,су, жарық өшпейді. Суымыз тоқтамай  келіп тұрады. Және барлық ауылдарда, көшелерде жаңа жол төселуде, бізге одан артық не керек, пейіште өмір сүргендей, жақсы өмір сүріп жатырмыз.

Аудандық ауруханаға қатты ауырып келіп жатқан адамдарды, ауданның бас дәрігерінен бастап, барлық дәрігерлер мен мейірбикелер тегін емдеуде. Біз оларға алғыстан басқа айтарымыз жоқ. Аудан ішінде үй тонау, мал ұрлау және неше түрлі ауыр қылмыстар болып жатады. Аудандық полиция бөлімінің бастығы подполковник Нұржан Ахметов бастаған, ұжым ұрлық жасағандарды және ауыр қылмыс істегендерді күндіз -түні іздеп тауып дер кезінде ұстап, жауапқа тартып жатқандықтарын және біздің аудан көп қылмыстың ашылып, ұсталғаны жағынан облыс бойынша, бірінші орында екендігі туралы айтты.

Сондықтан аудан тұрғындарына қызмет көрсететін мекеме басшыларына оның ішінде газ, жарық,  су, аурухана, аудандық полиция бөліміне еңбектеріңіз жемісті болсын, ел алғысына бөлене беріңіздер демекпін.

Әшен Қырғабақұлы,

Зейнеткер