ДЕНІ САУДЫҢ –ЖАНЫ САУ

«Нашақорлыққа қарсы күрес күніне орай Т.Рысқұлов ауылдық кітапханасы онлайн түрінде «Нашақорлық — шын қорлық» атты тәрбие сағатын өткізді.  «Дені саудың —  жаны сау» деп халқымыз бекер айтпаса керек. Өкінішке қарай, қоғамымызда адамзатпен ХХІ ғасырға аузын арандай ашқан аждаһадай сұм ажалдың төресі » нашақорлық», «ішімдік», «темекі»  пайда болды. Әсіресе, жастардың өміріне қатер туғызатын дерт — нашақорлық. Ол жас буынның есін алып, тағдырына балта шабады. Онымен әуестенген жігіттер мен бойжеткендер жастық шақтың әдемілігінен айырылып, арып-ашқан, сұрықсыз, аурушаң байқұстың кейпіне енеді. Оқу оқи алмайтын, жұмыс істей алмайтын, ұмытшақ сұлбаға айналады. Ағзаның қорғау қабілеті нашарлап, әдеттегі аурулармен жиі ауыратын болады. Нашақорлық — адам бойын улайтын кесел.  Ұлы ойшыл Сократқа кезінде мынадай сұрақ қойылыпты: «Адамға өмірде не қымбат? Байлық па, әлде атақ па?» деп.  Сонда Сократ: «Байлық та, атақ та, даңқ та адамды шын бақытты ете алмайды. Дені сау кедей, ауру патшадан бақыттырақ» деп жауап берген екен. Адам бақытты болу үшін оған денсаулық керек, ал денсаулықтың кепілі — салауаттылық. Әркімнің тағдыры өз қолында. «Есірткіге жолама, жетелейді молаға» демекші,  есірткі — бұл адамның көңіл-күйін, сана-сезімін, мінез-құлқын бұзатын қауіпті, тыйым салынған химиялық зат. Ол адамның есін алып, құмарлық желігіне ұшыратады, есірткісіз өмір сүре алмайтын бейшара халге түсіреді.  Есірткінің негізгі түрлеріне апиын,   кокаин, көкнәр, марихуана, гашиш және басқалар жатады. Барлығы да адам ағзасы мен психикасына әсер етіп зақымдайды.  Сұны «мидың қатерлі рагы» дейді. Егер асқынып кетсе, адам дағдарысқа ұшырайды. Жасөспірімдерді құрыққа түсіру үшін таратушылар түрлі айла-шарғыға барады. Есірткіні қолданар алдында ойлану керек. Ол ешқандай жақсылық әкелмейтінін ұмытпа!  Тәрбие сағатының негізгі мақсаты: әрбір азаматтың денсаулығы мықты болу үшін зиянды әдеттерден сақтандыру, өркениетті елімізге білімді, жаны таза, іскер азаматтар тәрбиелеп, қалыптастыру.

Назым Өзбекова,

«Меркі Ақиқат»