АНАЛАРҒА ҚҰРМЕТ – ҰЛТҚА ҚҰРМЕТ

Бүгін аудан әкімі Ербол Жиенқұлов көпбалалы аналарды арнайы қабылдап, Қазақстан Республикасы Президентінің Жарлығына сәйкес мемлекеттік наградалар – «Алтын алқа» және «Күміс алқа» белгілерін салтанатты түрде табыстады.
⠀
Жиын барысында аудан әкімі аналарды жоғары марапаттарымен құттықтап, олардың отбасы құндылықтарын дәріптеп, саналы ұрпақ тәрбиелеудегі еңбегі ел үшін аса маңызды екенін атап өтті. Сондай-ақ, көпбалалы аналардың ауданымыздың ғана емес, тұтас еліміздің демографиялық өсіміне қосып отырған үлесі ерекше екенін айтып, оларға шынайы ризашылығын білдірді.
⠀
– Ана – отбасының ғана емес, қоғамның да тірегі. Ұлттың болашағы – тәрбиелі ұрпақ, ал сол ұрпақты тәрбиелейтін ең аяулы жан – ана. Сіздердің еңбектеріңіз әрдайым құрметке лайық. Мемлекет тарапынан көрсетіліп жатқан бұл марапат – аналарға деген айрықша құрметтің белгісі. Баршаңызға зор денсаулық, отбастарыңызға амандық, бақ-береке тілеймін, – деді аудан әкімі.
⠀
Салтанатты шарада барлығы 40 көпбалалы ана мемлекеттік наградаға ие болды. Оның ішінде 9 ана «Алтын алқа», 31 ана «Күміс алқа» иегері атанды.
⠀
Марапат иелері көрсетілген құрмет үшін алғыстарын білдіріп, мемлекет тарапынан аналарға жасалып жатқан қолдау мен қамқорлықтың отбасы институтын нығайтудағы маңызы зор екенін атап өтті.