Әкім шыршасы

Жаңа жыл – балалар үшін әлемдегі қуанышқа толы, ең ғажайып мерекелердің бірі. Олар Жаңа жылдан жақсылық күтеді. Жаңа жылдық шырша — Жаңа жыл мейрамының негізгі нышаны.

Сондықтан да Жаңа жыл бәрінен бұрын балалар үшін ерекше мереке.
Мерекеге орай, балаларға қуаныш сыйлау мақсатында «Қош келдің, Жаңа жыл – жаңа белес, жаңа арман» тақырыбында жаңа жылдық мереке – Әкім шыршасы өтті.
Шырша мерекесіне озат оқушылар мен аз қамтылған және көпбалалы отбасылардан шыққан балалар қатысып, сондай-ақ, спортта, шығармашылықта жетістіктерге жеткен 9-13 жас аралығындағы балалар қамтылды.
Іс-шарада балаларға арнап ертегі желісі болса да олардың бос уақытын тиімді пайдалануға меңзейтін мәнді де мағыналы сахналық қойылым қойылды.
Балаларға кеңінен таныс ертегі кейіпкерлері, мерекенің басты кейіпкерлері барыс пен қоян, жаңа жылдың символына айналған Аяз ата мен Ақшақар шырша қуанышын балалармен бірге бөлісіп, жиналғандар түрлі сахналық қойылымды тамашалады.
Меркелік іс-шараға арнайы қатысқан аудан әкімі Баубеков Жорабек Нұрмергенұлы бүлдіршіндерді Жаңа жылмен құттықтады. Аудан әкімі «Жаңа жыл – бұл балаларымыздың ең асыға күтетін, бүлдіршіндерімізді ерекше елітіп, ертегілер әлеміне жетелейтін, сиқырлы сезімге толы мейрам десек те болады. Өйткені, бұл мерекеде балаларымыздың шынайы қуанып, мерекелік сезіммен көңіл көтергенін көреміз. Балалардың жүзінен шынайы бақытты, қуаныш пен шаттықты көруден асқан бақыт жоқ. Өйткені, балалар бақытты болса, біз де бақыттымыз», – деп мерекелік сыйлықтар тарту етті.
Іс-шара мерекелік концертке ұласып, балалар ертегілер еліне саяхаттап, ән айтып, би билеп, Жаңа жылдық кештен керемет әсер алды.

Аудан әкімдігінің баспасөз қызметі