ҚАНСОНАРДА БҮРКІТШІ ШЫҒАДЫ АҢҒА

Абай облысының Үржар ауданында құсбегілердің тұңғыш Әлем чемпионаты өтті. Онда меркілік бүркітшілеріміз Әлем чемпиондары атанды.

Қазақстан Республикасы Мемлекеттік Рәміздерінің 30 жылдығына орай ұйымдастырылған жарысқа бірнеше елден қыран баптап, ит жүгірткен азаматтар жиналды.
Жүйрік ат, қыран бүркіт, ұшқыр тазы баптаған жігіттің өнерпаздары Үржарда ауданында көпті таңқалдырды. Құсбегілердің әлемдік біріншілігі еліміз бойынша алғаш рет өткізіліп отыр. Оған 7 мемлекеттен, сондай-ақ еліміздің барлық облыстарынан төл өнерді дәріптегендер жиналды.
Әлем біріншілігін ҚР МСМ Спорт және дене шынықтыру істері комитеті, ҚР ұлттық спорт қауымдастығы, Ұлттық және ат спорты түрлері орталығы, Абай облысының әкімдігі ұйымдастырды.
Салтанатты шарада Абай облысы әкімінің орынбасары Ш.Байбеков, «Ұлттық және ат спорты түрлері орталығының» директоы Б.Сәбитов спортшылар мен қонактарды құттықтады. Алғашқы күні құсбегілер бүркітті қолға шақыру, еркін ұшыру, қаршығаны қолға шақыру, ителгіні қолға шақыру сынды сайыстардан сүрінбей өтіп, жартылай финал иегерлерін анықтады. Ал, ертесі жарыс қатысушылары бүркітті шырғаға, қоянға салу, қаршығаны қоянға салу, ителгіні қоянға салу бойынша сынға түсті.
Аталған чемпионатқа әлемнің жеті елінен 100-ден аса спортшы келді. Қазақстан, Моңғолия, Қырғызстан, Түркия, Ресей, Украина, Қытай елдерінен 61 бүркіт, 20 қаршыға, 15 ителгі қатысты.
Әлем біріншілігінде спортшылар «бүркіт», «қаршыға», «ителгі» бойынша сынға түсті.
Ұлттық құрама мүшелері Қазақстанның намысын абыроймен қорғады.
І-орын — Бабажан Серікболсын (Қазақстан – Меркілік жерлесіміз), ІІ-орын — Нұман Өмірбек (Қазақстан), ІІ-орын — Бәтілкәріп Өркен (Моңғолия), ІІІ-орын — Тастанбек Байрақ (Қазақстан).
Әкімбеков Жалғас Бабажанұлы Құсбегіліктен ҚР бірнеше дүркін чемпионы, 2016-2018 жылғы Қырғыстан мемлекетінде өткен Дүние жүзілік көшпенділер ойының екі мәрте жеңімпазы. Әкімбеков Жалғас ұлдары Бақдаулет, Серікболсын, Берікболсын атты ұлдарын Ұлттық спорт түріне, оның ішінде Құсбегілікпен, жамбы атуға әбден шыңдаған.
Атап айтсақ, Бабажан Бақдаулет ҚР құсбегіліктен 6 дүркін жеңімпазы, спорт шебері. Жамбы атудан Корея мемлекетінде өткен Әлем чемпионатының жеңімпазы, Азия чемпионы. Ол «Жыл мергені» атағын жеңіп алып, «Алтын тұғыр» иегері атанып, мерейімізді тасытқан еді.
Жалғасұлы Серікболсын құсбегіліктен спорт шебері, ҚР 5 дүркін чемпионы, Азия жүлдегері. Бүркіт салудан Әлем чемпионы атанып отыр. Жамбы атудан ҚР жастар арасындағы чемпионы. Республикалық «Ең үздік бүркітші» байқауында Серікболсын Жалғасұлы «Алтын тұғыр» иегері атанды. Жалпы, біздің ауданымыз осымен бесінші жыл қатарынан, 3 рет бүркіт, 2 рет жамбы атудан «Алтын тұғырды» жеңіп алды.
Бабажан Берікболсын қаршыға салудан Азия чемпионы, ҚР бірнеше дүркін чемпионы, спорт шебері. Ол құсбегіден жаттықтырушы, жамбы атудан Азия чемпионы, Корея мемлекетінде халықаралық турнирден 3 орын иегері.
Еске сала кетсек, Монғолия мемлекеті Баян-Өлгей қаласында өткен Халықаралық байқауда Қазақстан Республикасы құрама командасының жеті бүркітшісі өнер көрсетсе, соның бірі осы Бабажановтар отбасыларының мүшелері еді. Бұл Бүркіт тойында барлығы 105 бүркіт бақтарын сынап, І-орынды Монғолия мемлекеті, ІІ-орынды Атырау облысы, Жамбыл облысы Меркі ауданының №18 спорт мектебінің спортшысы Бабажан Бақдаулет «Қапсалған» аты бүркітімен ІІІ-орынды иеленген еді.
Айта берсек, бұл тізімдер мен жеткен жеңістердің саны саусақ жетпейтіндей болды.
Ұлттық спорт түрін дамытып, салт-дәстүрімізді жалғастырып жүрген Жалғас Әкімбеков ағамызға аудан жұртшылығы атынан үлкен алғыс білдеріміз. Келешек ұрпақтарына білген, түйгендерін дарытып, үйретіп, ұрпақтар сабақтастығының жалғаушысы болып жүрген Бабажановтар отбасына бақыт, табыс тілейміз. Әлем чемпионы болу – шыңдардың шыңы деп білеміз.

Лаззат Серікбай,
«Меркі Ақиқат»