Қысқы мерзімге дайындық деңгейі тексерілді

Қыс маусымы жақындауымен төтенше жағдайлардың алдын алу, тұрғындарға қауіпті жағдай туғызатын, табиғат апаттарынан қорғану мақсатында Меркі ауданында республикалық «Қыс – 2022» оқу-жаттығуы өткізілді.

Оған аудан әкімінің орынбасары Қайрат Арғымбаев қатысып, оқу-жаттығуда электр жүйелері, «ҚазТрансгаз» жылу жүйелері, «Меркі су» және авариялық-құтқару командасы, өрт сөндіру, медициналық қызмет, төтенше жағдайлардың алдын алу бөлімі, полиция қызметі, орман шаруашылығы мекемесінің транспорттық авариялық-құтқару командасы, санитариялық, экологиялық тазалықты бақылау, жол қызметкерлері, аудандық аурухананың психологиялық көмек, санитарлық эпидемиологиялық басқармасы қызметкерлері мен «Қазақтелеком» байланыс командасының мүшелері сап түзеді.
Аудандық төтенше жағдайлар бөлімінің басшысы Қанат Дәрменқұлов сапқа түзелген барлық бөлімдердің оқыс оқиға болған жағдайдағы жұмыс алгоритмдерін айтып, әрбір бөлімнің мамандарына жедел әрекет ету тізбесі бойынша сұрақтар қойды.
Оқу-жаттығу жұмыстарына тыңғылықты дайындалған сала мамандары құрал-саймандары мен техникалардың кез келген жағдайда әрекет етуге даяр екенін көрсетті.
Келесі кезекте оқу-жаттығу №17 Иван Трубицын атындағы мектеп қазандығында жалғасын тауып, төтенше жағдай кезіндегі әрекеттері теориялық түрден, тәжірибелік әдістерді көрсетуге ұласты.
Онда білім ордасының қазандығында төтенше жағдай болған кездегі іс әрекеттер пысықталды.
Медицина қызметкерлері алғашқы көмек көрсетумен айналысса, төтенше жағдай қызметкерлері жаттығуда өртті сөндіру, қазандықтан адамдарды эвокуациялау тактикасын іске асырды.
Біз оқу жаттығуды көзімізбен көріп, табиғат апаттары орын алмасын, еліміз аман, жұртымыз тыныш болсын деген ниетпен қайттық.

Ләззат Серікбай,
«Меркі Ақиқат“